പോളിംഗ് ശതമാനം കണ്ട് വിലയിരുത്തൽ നടത്താനാവാതെ മുന്നണികൾ. ഫലത്തെ സ്വാധീനിക്കുക അടിയൊഴുക്കുകളും യുവ, വനിതാ വോട്ടർമാരും. ന്യൂനപക്ഷ മുസ്ലിം - ക്രിസ്ത്യൻ പിന്തുണയും നിർണായകം. തദ്ദേശതിരഞ്ഞെടുപ്പ് ഒന്നര വർഷവും നിയമസഭാ തിരഞ്ഞെടുപ്പ് രണ്ടു വർഷവും അകലെ. മൂന്ന് മുന്നണികൾക്കും ഇത് നിലനിൽപിനുള്ള ജീവന്മരണ പോരാട്ടം

രാത്രി ഏഴ് വരെയുള്ള കണക്ക് പ്രകാരം സംസ്ഥാനത്ത് 69.04 ശതമാനം പോളിംഗ് നടന്നിട്ടുണ്ട്. അവസാന കണക്കിൽ ഇത് 75 ശതമാനത്തിനടുത്ത് എത്താനിടയുണ്ട്. കണ്ണൂരിലാണ് ഏറ്റവുമധികം പോളിംഗ്- 73.80 ശതമാനം. കാസർകോട് 72.52 ശതമാനവുമായി തൊട്ടുപിന്നിൽ. ഉയർന്ന പോളിംഗ് ശതമാനം യു.ഡി.എഫ്, എൽ.ഡി.എഫ്. എൻ.ഡി.എ മുന്നണികൾക്ക് ഒരുപോലെ പ്രതീക്ഷയും ഉൾക്കിടിലവും പകരുന്നതാണ്.