കപ്പ് കൈവിട്ടാലും, കിട്ടിയത് കൊട്ടക്കണക്കിന് പണം; ഏകദിന ലോകകപ്പിലെ ആതിഥേയത്വത്തിലൂടെ ഇന്ത്യയ്ക്ക് കോളടിച്ചു, വന്‍ സാമ്പത്തിക നേട്ടം ! റിപ്പോര്‍ട്ട്‌

2023ലെ ഏകദിന ലോകകപ്പ് ആതിഥേയരായ ഇന്ത്യയ്ക്ക് മറക്കാനാകില്ല. അപരാജിതരായി ഫൈനലിലെത്തിയ ഇന്ത്യ കലാശപ്പോരാട്ടത്തില്‍ ഓസീസിനോട് തോറ്റു. ക്രിക്കറ്റ് ആരാധകരെ സംബന്ധിച്ചിടത്തോളം തീരാവേദനയാണ് ആ തോല്‍വി. എന്നാല്‍ ഏകദിന ലോകകപ്പിലെ ആതിഥേയത്വത്തിലൂടെ ഇന്ത്യയ്ക്ക് വന്‍ സാമ്പത്തിക നേട്ടമുണ്ടായെന്നാണ് റിപ്പോര്‍ട്ട്.

ഏകദിന ലോകകപ്പ്‌ ഇന്ത്യയുടെ സമ്പദ്‌വ്യവസ്ഥയിൽ 1.39 ബില്യൺ ഡോളറിൻ്റെ (11,637 കോടി രൂപ) ശ്രദ്ധേയമായ സാമ്പത്തിക സ്വാധീനം ചെലുത്തിയെന്ന്‌ ഇൻ്റർനാഷണൽ ക്രിക്കറ്റ് കൗൺസിൽ (ഐസിസി) റിപ്പോർട്ട് വ്യക്തമാക്കുന്നു.

അഹമ്മദാബാദ്, ബെംഗളൂരു, ചെന്നൈ, ഡൽഹി, ധർമ്മശാല, ഹൈദരാബാദ്, കൊൽക്കത്ത, ലഖ്‌നൗ, മുംബൈ, പൂനെ എന്നീ 10 ഇന്ത്യൻ നഗരങ്ങളാണ് ടൂർണമെൻ്റിന് ആതിഥേയത്വം വഹിച്ചത്. 

എല്ലാ നഗരങ്ങളും വിവിധ മേഖലകളിലെ വളർച്ചയ്ക്ക് സംഭാവന നൽകി. രാജ്യത്തിന്റെ സമ്പദ്‌വ്യവസ്ഥയ്ക്ക് മുതല്‍ക്കൂട്ടായി ഏകദിന ലോകകപ്പ് മാറി. ഒരു ആഗോള കായിക ടൂര്‍ണമെന്റിന് ആതിഥേയത്വം വഹിക്കുന്നത് രാജ്യത്തിൻ്റെ സമ്പദ്‌വ്യവസ്ഥയ്ക്ക് എങ്ങനെ പ്രയോജനം ചെയ്യുമെന്ന് തെളിയിക്കുകയും ചെയ്തു.

നിരവധി ആതിഥേയ സ്റ്റേഡിയങ്ങളുടെ നവീകരണ പ്രക്രിയയിൽ നിന്ന് ബിസിനസ് മേഖലകള്‍ നേട്ടം കൈവരിച്ചു. ബിസിസിഐ, ഐസിസി എന്നിവയില്‍ നിന്ന് നേരിട്ട് നിക്ഷേപം സ്വീകരിച്ചായിരുന്നു സ്റ്റേഡിയങ്ങളുടെ നവീകരണം. 

മത്സരങ്ങളിൽ പങ്കെടുക്കുന്ന ആഭ്യന്തര, അന്തർദേശീയ വിനോദസഞ്ചാരികളുടെ ഗണ്യമായ ഒഴുക്ക് കാരണം ആതിഥേയ നഗരങ്ങളിലെ ടൂറിസം താമസം, യാത്ര, ഗതാഗതം, ഭക്ഷണ പാനീയങ്ങൾ എന്നിവയിൽ നിന്ന് ഗണ്യമായ $861.4 മില്യൺ വരുമാനം നേടി.