കോട്ടയം: ജില്ലയിൽ പ്ലസ് വൺ പ്രവേശനത്തിനായുള്ള അപേക്ഷാ സമർപ്പണം പൂർത്തിയായി. ട്രയൽ അലോട്ട്‌മെന്റ് 29 ന്. ഓൺലൈനിലൂടെയുള്ള അപേക്ഷ സമർപ്പണം പൂർത്തിയായപ്പോൾ ജില്ലയിൽ ലഭിച്ചത് 25374 അപേക്ഷകളാണ്. ഇതിൽ 22517 അപേക്ഷകൾ ജില്ലയിൽ നിന്നുള്ളവരുടേതും 2857 അപേക്ഷകൾ മറ്റു ജില്ലകളിൽനിന്നുള്ളവരുടേതുമാണ്. ജൂൺ അഞ്ചിന് ആദ്യ അലോട്ട്‌മെന്‍റും 12ന് രണ്ടാം അലോട്ട്‌മെന്‍റും 19 ന് മൂന്നാം അലോട്ട്‌മെന്‍റും നടക്കും. ജൂൺ 24 നാണ് പ്ലസ് വൺ ക്ലാസുകൾ ആരംഭിക്കുക. സപ്ലിമെന്ററി അലോട്ട്‌മെന്‍റുകളിലൂടെ ശേഷിക്കുന്ന ഒഴിവുകൾ നികത്തി ജൂലൈ 31 ന് പ്രവേശന നടപടികൾ അവസാനിപ്പിക്കും. മുൻ വർഷം ക്ലാസ് ആരംഭിച്ചത് ജൂലൈ അഞ്ചിനായിരുന്നു.
എസ്.എസ്.എൽ.സി പരീക്ഷ വിജയിച്ച 19940 പേരും സി.ബി.എസ്.ഇ പത്താംക്ലാസ് വിജയിച്ച 1909 പേരും ഐ.സി.എസ്.ഇ സിലബസിൽനിന്ന് 233 പേരും മറ്റ് വിഭാഗത്തിൽനിന്ന് 435 പേരും പ്ലസ് വണ്ണിന് അപേക്ഷിച്ചിട്ടുണ്ട്. ജില്ലയിൽ സർക്കാർ, എയ്ഡഡ്, അൺ എയ്ഡഡ് സ്കൂളുകളിലായി 21986 സീറ്റുകളാണുള്ളത്. സർക്കാർ സ്‌കൂളുകളിൽ 5100, എയ്ഡഡ് സ്‌കൂളുകളിൽ 13800, അൺ-എയ്ഡഡ് സ്‌കൂളുകളിൽ 3,086 എന്നിങ്ങനെയാണ് സീറ്റുകളുടെ എണ്ണം.
ഇത്തവണ 18813 പേരാണ് കോട്ടയത്തുനിന്ന് എസ്.എസ്.എൽ.സി പരീക്ഷ വിജയിച്ചത്. ഇവർക്കെല്ലാം ഉപരിപഠനത്തിന് അവസരം ലഭിക്കും. സി.ബി.എസ്.ഇ, ഐ.സി.എസ്.ഇ സിലബസിൽ പഠിച്ചവരിൽ നിശ്ചിതശതമാനത്തിനും സീറ്റ് കിട്ടും. കഴിഞ്ഞ വർഷം 21958 സീറ്റുകളിലേക്ക് 22897 അപേക്ഷകളാണ് ലഭിച്ചത്. 11286 പേർക്ക് ആദ്യഅലോട്ട്മെന്‍റ് ലഭിച്ചിരുന്നു. ഇത്തവണ 380 അപേക്ഷകൾ കുറവുണ്ട്. സി.ബി.എസ്.ഇ, ഐ.സി.എസ്.ഇ സിലബസിൽ പത്താംക്ലാസ് പഠിച്ചവരിൽ ഒരുവിഭാഗം സംസ്ഥാന സിലബസിലേക്ക് മാറും. ഇവർ എത്തിയാലും ജില്ലയിലെ പ്ലസ്വൺ പ്രവേശനത്തിന് തിരക്കുണ്ടാകില്ലെന്ന് വിദ്യാഭ്യാസ വകുപ്പ് പറയുന്നു. ജില്ലയിൽ മൊത്തം 133 പ്ലസ്ടു സ്‌കൂളുകളാണുള്ളത്. ഇതിൽ സർക്കാർ -41, എയ്ഡഡ് -71, അൺ എയ്ഡഡ് -21 എന്നിങ്ങനെയാണ് സ്‌കൂളുകളുടെ കണക്ക്.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/YM7Jwa0mg1Pw4tnAKQuX.jpg)