ലയണല്‍ മെസിയും അര്‍ജ്ജന്റീന ടീമും കേരളത്തിലേക്ക്. കേരളത്തില്‍ സൗഹൃദ മത്സരത്തിന് തയ്യാറാണെന്ന് അര്‍ജന്റീന ഫുട്‌ബോള്‍ ടീം അറിയിച്ചതായി കായികമന്ത്രി

തിരുവനന്തപുരം: ഫുട്ബോള്‍ ഇതിഹാസതാരം ലയണല്‍ മെസി കേരളത്തില്‍ എത്തുന്നു. അടുത്ത വര്‍ഷം നടക്കുന്ന സൗഹൃദമത്സരത്തില്‍ പങ്കെടുക്കാനായി മെസിയും ടീമും സംസ്ഥാനത്ത് എത്തുമെന്ന് കായികമന്ത്രി വി അബ്ദുറഹിമാന്‍ അറിയിച്ചു.

കേരളത്തില്‍ സൗഹൃദ മത്സരത്തിന് തയ്യാറാണെന്ന് അര്‍ജന്റീന ഫുട്‌ബോള്‍ ടീം അറിയിച്ചു. ഔദ്യോഗിക പ്രഖ്യാപനം അര്‍ജന്റീന ഫുട്ബോള്‍ അസോസിയേഷന്‍ നടത്തും.

അടുത്ത വര്‍ഷം നടക്കുന്ന മത്സരത്തിന്റെ തീയതിയും എഎഫ്എ പ്രഖ്യാപിക്കുമെന്ന് മന്ത്രി പറഞ്ഞു. സെപ്റ്റംബര്‍, ഒക്ടോബര്‍ മാസങ്ങളിലാകും മത്സരം നടക്കുക.

മത്സരത്തിന്റെ ചെലവ് കേരള ഗോള്‍ഡ് ആന്‍ഡ് സില്‍വര്‍ മര്‍ച്ചന്റ്‌സും വ്യാപാരി വ്യവസായി സമിതിയും വഹിക്കും. മത്സരം പൂര്‍ണമായും സര്‍ക്കാര്‍ നിയന്ത്രണത്തിലായിരിക്കുമെന്നും മന്ത്രി പറഞ്ഞു.