കൊല്ലം: കെഎസ്ആർടിസി ബസ് മോഷ്ടിക്കാൻ ശ്രമിച്ച യുവാവ് പിടിയിൽ. കൊല്ലം പുനലൂർ ഡിപ്പോയ്ക്ക് സമീപം വഴിയരികിൽ നിർത്തിയിട്ടിരുന്ന ബസ് മോഷ്ടിക്കാൻ ശ്രമിച്ച തെന്മല സ്വദേശി ബിനീഷാണ് പൊലീസിന്റെ വലയിലായത്.
ഹെഡ്ലൈറ്റ് തെളിക്കാതെ ബസ് വരുന്നത് ശ്രദ്ധയിൽപെട്ടതോടെയാണ് മോഷണശ്രമം പുറത്താകുന്നത്. കഴിഞ്ഞ ദിവസം രാത്രിയാണ് സംഭവം. ഡിപ്പോയ്ക്ക് 150 മീറ്റർ അകലെ വാഹന പരിശോധന നടത്തുന്നതിനിടെയാണ് പൊലീസ് ബസ് കാണുന്നത്. സംശയം തോന്നിയതോടെ കൈ കാണിച്ച് ബസ് നിർത്തിക്കുകയായിരുന്നു.
ബസിൽ നിന്നിറങ്ങി ഓടി രക്ഷപ്പെടാൻ ശ്രമിച്ച യുവാവിനെ കസ്റ്റഡിയിലെടുക്കുകയായിരുന്നു. ഡിപ്പോയിലെ സ്ഥലപരിമിതി മൂലം പല ബസുകളും റോഡിലാണ് നിർത്താറുള്ളത്. ഇതാണ് മോഷ്ടാവിന് സൗകര്യമായത്.