ആന എഴുന്നള്ളിപ്പ് നിലനിര്‍ത്തുന്നതോടൊപ്പം നാട്ടാനകളുടെ ആരോഗ്യവും സംരക്ഷണവും ഉറപ്പുവരുത്തും: മന്ത്രി എ.കെ. ശശീന്ദ്രന്‍

തിരുവനന്തപുരം: കേരളീയ തനിമയോടെ ആചാരങ്ങളിലും ഉത്സവങ്ങളിലും ആന എഴുന്നള്ളിപ്പ് നിലനിര്‍ത്തുന്നതോടൊപ്പം നാട്ടാനകളുടെ ആരോഗ്യവും സംരക്ഷണവും ഉറപ്പുവരുത്തുമെന്ന് മന്ത്രി എ.കെ. ശശീന്ദ്രന്‍. 

രാജ്യത്ത് ആദ്യമായി നാട്ടാന പരിപാലന ചട്ടങ്ങള്‍ നടപ്പിലാക്കിയ സംസ്ഥാനം കേരളമാണ്. 2003ല്‍ ആദ്യമായി വന്ന ചട്ടം 2012ല്‍ ഭേദഗതി ചെയ്തതാണ് നിലവില്‍ പ്രാബല്യത്തിലുള്ളത്. 2018 ലെ നാട്ടാന സെന്‍സസ് പ്രകാരം കേരളത്തില്‍ 521 നാട്ടാനകളുണ്ടായിരുന്നു. നിലവിലെ കണക്ക് പ്രകാരം 381 നാട്ടാനകള്‍ ഉള്ളതില്‍ 39 എണ്ണം വനം വകുപ്പിന്റെ സംരക്ഷണയിലുള്ളതാണ്. 

ആനകളുടെ എണ്ണത്തില്‍ കുറവ് വന്നതും ഉത്സവങ്ങളിലടക്കം ആനകള്‍ക്ക് ആവശ്യം കൂടിയ സാഹചര്യം നിലവിലുണ്ട്. ഇതോടെ ആനകളുടെ പ്രദര്‍ശനവും ഉപയോഗവും നിയന്ത്രണാതീതമായി വര്‍ധിച്ചു. ആനകളുടെ ഉടമസ്ഥര്‍, ഉത്സവ നടത്തിപ്പുകാര്‍, ആന പരിപാലന സംഘടനകള്‍ എന്നിവരുടെ അഭിപ്രായങ്ങളും നിര്‍ദേശങ്ങളും കൂടി പരിഗണിച്ച് ചട്ടം നടപ്പിലാക്കാനാണ് സര്‍ക്കാര്‍ ഉദ്ദേശിക്കുന്നതെന്നും മന്ത്രി പറഞ്ഞു.