എനിക്ക് നിങ്ങളെ അറിയാം, നിങ്ങള്‍ വളരെ പ്രശസ്തനാണ്. ജയശങ്കറിനെ പ്രശംസിച്ച് ഇന്തോനേഷ്യന്‍ പ്രസിഡന്റ്

റിയോ ഡി ജനീറോ: ബ്രസീലില്‍ നടക്കുന്ന ജി 20 ഉച്ചകോടിയുടെ ഭാഗമായി ഉഭയകക്ഷി യോഗത്തിനായി പ്രധാനമന്ത്രി നരേന്ദ്ര മോദിയ്‌ക്കൊപ്പം എത്തിയ വിദേശകാര്യ മന്ത്രി എസ് ജയശങ്കറിന് ഊഷ്മളമായ സ്വീകരണം നല്‍കി ഇന്തോനേഷ്യന്‍ പ്രസിഡന്റ് പ്രബോവോ സുബിയാന്തോ.

എനിക്ക് നിങ്ങളെ അറിയാം, നിങ്ങള്‍ വളരെ പ്രശസ്തനാണ്. ജയശങ്കര്‍ തന്നെ സ്വയം പരിചയപ്പെടുത്തിയപ്പോള്‍ ഇന്തോനേഷ്യന്‍ പ്രസിഡന്റ് പറഞ്ഞത് ഇങ്ങനെയായിരുന്നു.

ഉഭയകക്ഷി യോഗത്തിന് പോകുന്നതിന് മുമ്പ് ജയശങ്കറും സുബിയാന്തോയും കൈകൊടുത്ത് പരിചയപ്പെടുമ്പോള്‍ പ്രധാനമന്ത്രി മോദി പുഞ്ചിരിച്ചു നില്‍ക്കുന്ന ചിത്രവും പുറത്തുവന്നിട്ടുണ്ട്. 

ഇന്തോനേഷ്യന്‍ പ്രസിഡന്റുമായുള്ള കൂടിക്കാഴ്ചയില്‍ വ്യാപാരം, വാണിജ്യം, ആരോഗ്യം, സുരക്ഷ തുടങ്ങിയ മേഖലകളിലെ സഹകരണം പ്രധാനമന്ത്രി മോദി ചര്‍ച്ച ചെയ്തു.

പ്രബോവോ സുബിയാന്തോ ഇന്തോനേഷ്യന്‍ പ്രസിഡന്റായി തിരഞ്ഞെടുക്കപ്പെട്ടതിന് ശേഷം ഇരു നേതാക്കളുടെയും ആദ്യ കൂടിക്കാഴ്ചയായിരുന്നു ഇത്.