'നമ്മുടെ സര്‍ക്കാര്‍ നാലാം തവണ അധികാരത്തിലെത്തിയില്ലെങ്കിലും, രാംദാസ് അത്താവലെ കേന്ദ്രമന്ത്രിയാകും': അത്താവലെയെ പരിഹസിച്ച് നിതിന്‍ ഗഡ്കരി

നാഗ്പുര്‍: മാറി മാറി വരുന്ന സര്‍ക്കാരുകളില്‍ മന്ത്രിയാകാനുള്ള കേന്ദ്രഹമന്ത്രി രാംദാസ് അത്താവലെയുടെ 'കഴിവി'നെ പരിഹസിച്ച് കേന്ദ്രമന്ത്രി നിതിന്‍ ഗഡ്കരി. 

"നമ്മുടെ സർക്കാർ നാലാം തവണയും അധികാരത്തിലെത്തുമെന്ന്‌ ഉറപ്പില്ലായിരിക്കാം.  പക്ഷേ രാംദാസ് അത്താവലെ മന്ത്രിയാകുമെന്ന് ഉറപ്പാണ്"-മഹാരാഷ്ട്രയിലെ നാഗ്പൂരിൽ നടന്ന ഒരു പരിപാടിയില്‍ ഗഡ്കരി പറഞ്ഞു. താന്‍ തമാശയ്ക്ക് പറഞ്ഞതാണെന്നും തുടര്‍ന്ന് അദ്ദേഹം വ്യക്തമാക്കി.

റിപ്പബ്ലിക്കൻ പാർട്ടി ഓഫ് ഇന്ത്യയുടെ (ആർപിഐ) നേതാവായ അത്താവലെ മൂന്ന് തവണ മന്ത്രിയായി സേവനമനുഷ്ഠിച്ചിട്ടുണ്ട്.

അതേസമയം,  മഹാരാഷ്ട്ര ഭരിക്കുന്ന മഹായുതി സർക്കാരിലെ സഖ്യകക്ഷിയായ തൻ്റെ പാർട്ടിയായ ആർപിഐ (എ) വരുന്ന നിയമസഭാ തിരഞ്ഞെടുപ്പിൽ കുറഞ്ഞത് 10 മുതൽ 12 സീറ്റുകളിലെങ്കിലും മത്സരിക്കണമെന്ന് അത്താവലെ പറഞ്ഞു.

ആർപിഐ-എ തങ്ങളുടെ പാർട്ടി ചിഹ്നത്തിൽ തിരഞ്ഞെടുപ്പിൽ മത്സരിക്കുമെന്നും വടക്കൻ നാഗ്പൂർ, ഉംരെദ് (നാഗ്പൂർ), യവത്മാലിലെ ഉമർഖേഡ്, വാഷിം എന്നിവയുൾപ്പെടെ വിദർഭയിൽ മൂന്നോ നാലോ സീറ്റുകൾ ആവശ്യപ്പെടുമെന്നും നാഗ്പൂരിൽ വാർത്താ സമ്മേളനത്തിൽ അദ്ദേഹം പറഞ്ഞു.

ബി.ജെ.പി., മുഖ്യമന്ത്രി ഏകനാഥ് ഷിൻഡെയുടെ നേതൃത്വത്തിലുള്ള ശിവസേന, അജിത് പവാറിൻ്റെ എൻ.സി.പി. എന്നിവ ഉൾപ്പെടുന്ന മഹായുതി സഖ്യത്തിൻ്റെ ഭാഗമാണ് അത്താവാലെയുടെ പാർട്ടി.

"ആർപിഐ-എ 18 സാധ്യതാ സീറ്റുകളുടെ പട്ടിക തയ്യാറാക്കി. അത് ഏതാനും ദിവസങ്ങൾക്കുള്ളിൽ മഹായുതിയിലെ പാര്‍ട്ടികളുമായി പങ്കിടും. കുറഞ്ഞത് 10 മുതൽ 12 സീറ്റുകൾ വരെ ലഭിക്കുമെന്ന് പ്രതീക്ഷിക്കുന്നു" എന്നും അത്താവാലെ പറഞ്ഞു.

ബിജെപിയും ശിവസേനയും എൻസിപിയും അവരുടെ ക്വോട്ടയിൽ നിന്ന് നാല് സീറ്റുകൾ വീതം തൻ്റെ പാർട്ടിക്ക് നൽകണമെന്നും അദ്ദേഹം പറഞ്ഞു. 

അജിത് പവാറിൻ്റെ നേതൃത്വത്തിലുള്ള എൻസിപിയെ മഹായുതി സർക്കാരിൽ ഉൾപ്പെടുത്തിയതിനാൽ, വാഗ്ദാനം നൽകിയിട്ടും പാര്‍ട്ടിക്ക്‌ സംസ്ഥാനത്ത് മന്ത്രിസ്ഥാനം ലഭിച്ചില്ലെന്ന് ഈ ആഴ്ച ആദ്യം പാൽഘറിൽ അത്താവാലെ പറഞ്ഞിരുന്നു.

കാബിനറ്റ് സ്ഥാനങ്ങൾ, രണ്ട് കോർപ്പറേഷനുകളുടെ അധ്യക്ഷൻ, ജില്ലാതല കമ്മിറ്റികളിലെ റോൾ എന്നിവ പാർട്ടിക്ക് വാഗ്ദാനം ചെയ്തിരുന്നെങ്കിലും പവാറിനെ ഉൾപ്പെടുത്തിയതിനാൽ ഇതെല്ലാം നടന്നില്ലെന്നും അദ്ദേഹം പറഞ്ഞു.