കോണ്‍ഗ്രസ് അധികാരത്തിലെത്തിയാല്‍ ഒറ്റയടിക്ക് ദാരിദ്ര്യം തുടച്ചുനീക്കുമെന്ന രാഹുല്‍ ഗാന്ധി; 'ഈ രാജകീയ മാന്ത്രികൻ ഇത്രയുംനാള്‍ എവിടെ ഒളിച്ചിരിക്കുകയായിരുന്നു'വെന്ന് പരിഹസിച്ച് നരേന്ദ്ര മോദി

ന്യൂഡല്‍ഹി: കോണ്‍ഗ്രസ് കേന്ദ്രത്തില്‍ അധികാരത്തിലെത്തിയാല്‍ ഒറ്റയടിക്ക് രാജ്യത്തെ ദാരിദ്ര്യം തുടച്ചുനീക്കുമെന്ന രാഹുല്‍ എംപിയുടെ പ്രഖ്യാപനത്തെ പരിഹസിച്ച് പ്രധാനമന്ത്രി നരേന്ദ്ര മോദി. ഇത്രയും വര്‍ഷം ഈ രാജകീയ മാന്ത്രികന്‍ എവിടെയാണ് ഒളിച്ചിരുന്നതെന്നായിരുന്നു രാഹുലിനെ പരിഹസിച്ച് മോദി പറഞ്ഞത്.

 മധ്യപ്രദേശിലെ ഹോഷംഗബാദിൽ ഒരു പൊതുറാലിയെ അഭിസംബോധന ചെയ്യവെയാണ് പ്രധാനമന്ത്രി ഇക്കാര്യം പറഞ്ഞത്. രാഹുൽ ഗാന്ധിയെ കോൺഗ്രസിൻ്റെ രാജകുമാരൻ എന്നാണ് മോദി വിളിച്ചത്.

"ഒറ്റയടിക്ക് ദാരിദ്ര്യം ഇല്ലാതാക്കുമെന്ന് കോൺഗ്രസ്സ് രാജകുമാരൻ പ്രഖ്യാപിച്ചപ്പോൾ രാജ്യം മുഴുവൻ ആശ്ചര്യപ്പെട്ടു. നിങ്ങൾ ഇത് വായിച്ച് ചിരിക്കും... ഈ രാജകീയ മാന്ത്രികൻ ഇത്രയും വർഷം എവിടെയാണ് ഒളിച്ചിരുന്നത് എന്ന് രാജ്യം ചോദിക്കുന്നു. ചിരിക്കാൻ തോന്നില്ലേ? ഇങ്ങനെയുള്ള ഒരാളെ ആരെങ്കിലും വിശ്വസിക്കുമോ?", മോദി പറഞ്ഞു.

കഴിഞ്ഞയാഴ്ച രാജസ്ഥാനിൽ നടന്ന ഒരു തിരഞ്ഞെടുപ്പ് റാലിയിലാണ് കോണ്‍ഗ്രസ് അധികാരത്തിലെത്തിയാല്‍ ഒറ്റയടിക്ക് ദാരിദ്ര്യം ഇല്ലാതാക്കുമെന്ന് രാഹുല്‍ പറഞ്ഞത്. ദാരിദ്ര്യം അനുഭവിക്കുന്ന കുടുംബത്തിലെ ഒരു സ്ത്രീയുടെ അക്കൗണ്ടിലേക്ക് വർഷം ഒരു ലക്ഷം രൂപ നൽകുമെന്നും അദ്ദേഹം പറഞ്ഞിരുന്നു.

കോൺഗ്രസിൻ്റെ പ്രകടന പത്രികയിൽ 'ന്യായ് പത്ര' എന്ന് പേരിട്ടിരിക്കുന്ന മഹാലക്ഷ്മി പദ്ധതിയെക്കുറിച്ചും അദ്ദേഹം സംസാരിച്ചു. മഹാലക്ഷ്മി പദ്ധതി പ്രകാരം, സാമ്പത്തിക സ്ഥിരതയും പിന്തുണയും ഉറപ്പാക്കിക്കൊണ്ട് എല്ലാ പാവപ്പെട്ട കുടുംബത്തിലെയും ഒരു സ്ത്രീക്ക് പ്രതിവർഷം ഒരു ലക്ഷം രൂപ നൽകുമെന്ന് പാർട്ടി വാഗ്ദാനം ചെയ്തിട്ടുണ്ടെന്ന് രാഹുല്‍ പറഞ്ഞു.

കർഷകർ ആവശ്യപ്പെടുന്ന മിനിമം താങ്ങുവില, തൊഴിലില്ലായ്മ, വിലക്കയറ്റം എന്നീ വിഷയങ്ങള്‍ മുന്‍നിര്‍ത്തി അദ്ദേഹം ബിജെപിയെ രൂക്ഷമായി വിമര്‍ശിച്ചു.  പിന്നാക്ക വിഭാഗങ്ങളുടെയും കർഷകരുടെയും പാവപ്പെട്ടവരുടെയും താൽപ്പര്യങ്ങൾ മുൻനിർത്തിയുള്ള വിഷയങ്ങളിൽ സംസാരിക്കാൻ ബിജെപി ഇഷ്ടപ്പെടുന്നില്ലെന്നും അദ്ദേഹം ആരോപിച്ചു.

"ഇപ്പോൾ രാജ്യത്തെ ഏറ്റവും വലിയ രണ്ട് പ്രശ്‌നങ്ങൾ തൊഴിലില്ലായ്മയും പണപ്പെരുപ്പവുമാണ്. അവർ (ബിജെപി) തൊഴിലില്ലായ്മയെക്കുറിച്ചോ പണപ്പെരുപ്പത്തെക്കുറിച്ചോ സംസാരിക്കുന്നില്ല. നിങ്ങളുടെ ശ്രദ്ധ തിരിക്കാനാണ് അവരുടെ ജോലി. പിന്നാക്ക വിഭാഗങ്ങളുടെയും കർഷകരുടെയും ദരിദ്രരുടെയും പ്രശ്നങ്ങൾ ദേശീയ, പ്രാദേശിക മാധ്യമങ്ങളിൽ കാണിക്കാൻ അവർ ആഗ്രഹിക്കുന്നില്ല. 24 മണിക്കൂറും മാധ്യമങ്ങളിൽ നരേന്ദ്ര മോദിയുടെ മുഖം കാണാം. മാധ്യമങ്ങളുടെ ജോലി പൊതുജനങ്ങളുടെ ശബ്ദം ഉയർത്തുക എന്നതാണ്, എന്നാൽ അവരുടെ കോടീശ്വരൻ ഉടമകൾ അവരെ അതിന് അനുവദിക്കില്ല, ”അദ്ദേഹം പറഞ്ഞു.

കോൺഗ്രസിൻ്റെ മരവിപ്പിച്ച ബാങ്ക് അക്കൗണ്ടുകളെ കുറിച്ച് സംസാരിച്ച രാഹുൽ ഗാന്ധി കേന്ദ്ര സർക്കാരിനെതിരെ ആഞ്ഞടിച്ചു. ബിജെപി വൻകിട വ്യവസായികളിൽ നിന്ന് ഇലക്ടറൽ ബോണ്ടുകൾ വഴി പണം കൈപ്പറ്റുകയാണെന്ന് രാഹുൽ ആരോപിച്ചു. 

''മോദി സർക്കാരിൻ്റെ കഴിഞ്ഞ 5 വർഷത്തിനിടെ അഴിമതി വൻതോതിൽ വർധിച്ചു. കഴിഞ്ഞ 5 വർഷത്തിനിടെ അഴിമതി അതിവേഗം വർധിച്ചതായി 55 ശതമാനം ആളുകളും വിശ്വസിക്കുന്നതായി സർവേ പറയുന്നു. അഴിമതി വർധിച്ചതിന് ഉത്തരവാദി മോദി സർക്കാരാണെന്ന് 25 ശതമാനം ആളുകൾ വിശ്വസിക്കുന്നു. ഒരു കാരണവുമില്ലാതെ പൊതുജനങ്ങൾ ഇത് പറയില്ല," രാഹുൽ ഗാന്ധി പറഞ്ഞു.

രാജ്യത്തുടനീളമുള്ള അഴിമതിക്കാർക്ക് 'മോദിയുടെ വാഷിംഗ് മെഷീനിൽ' നിന്ന് ക്ലീൻ ചിറ്റ് ലഭിക്കുന്നു. മോദി സർക്കാർ അഴിമതി നിറഞ്ഞ സർക്കാരാണ്. പ്രധാനമന്ത്രി മോദിയുടെ മേൽനോട്ടത്തിലാണ് ഈ അഴിമതി നടക്കുന്നതെന്നും രാഹുല്‍ ആരോപിച്ചു.