ഒഡീഷയിൽ ഏറ്റുമുട്ടലിൽ മാവോയിസ്റ്റ് കൊല്ലപ്പെട്ടു, പോലീസുകാരന് പരിക്കേറ്റു

മല്‍ക്കന്‍ഗിരി: ഒഡീഷ-ഛത്തീസ്ഗഢ് അതിര്‍ത്തിക്കടുത്തുള്ള ജിനെലിഗുഡ വനത്തില്‍ സുരക്ഷാ സേനയും മാവോയിസ്റ്റും തമ്മിലുണ്ടായ ഏറ്റുമുട്ടലില്‍ ഒരു മാവോയിസ്റ്റ് കൊല്ലപ്പെടുകയും ഒരു പോലീസുകാരന് പരിക്കേല്‍ക്കുകയും ചെയ്തു.

മാല്‍കന്‍ഗിരി ജില്ലയിലെ വനത്തിലൂടെ ഒഡീഷയിലേക്കുള്ള മാവോയിസ്റ്റുകളുടെ വരവ് തടയാന്‍ പോലീസ് ഉദ്യോഗസ്ഥര്‍ ബുധനാഴ്ച രാത്രി നടത്തിയ തിരച്ചിലിനിടെയാണ് ഏറ്റുമുട്ടലുണ്ടായതെന്ന് മുതിര്‍ന്ന ഉദ്യോഗസ്ഥന്‍ പറഞ്ഞു.

ഓപ്പറേഷനില്‍ രണ്ട് മാവോയിസ്റ്റുകളും പിടിയിലായതായി അദ്ദേഹം പറഞ്ഞു.

പരിക്കേറ്റ പോലീസുകാരന്‍ ദമരു ബദനായിക്കിനെ മല്‍ക്കന്‍ഗിരി ജില്ലാ ഹെഡ്ക്വാര്‍ട്ടേഴ്സ് ആശുപത്രിയില്‍ പ്രവേശിപ്പിച്ചു. മരിച്ച മാവോയിസ്റ്റിനെ ഇതുവരെ തിരിച്ചറിഞ്ഞിട്ടില്ലെന്നും ഉദ്യോഗസ്ഥര്‍ പറഞ്ഞു.

രണ്ട് മണിക്കൂറോളം വെടിവയ്പ്പ് തുടര്‍ന്നു. തുടര്‍ന്ന് പ്രദേശത്ത് പോലീസ് തിരച്ചില്‍ ആരംഭിച്ചതായും അദ്ദേഹം കൂട്ടിച്ചേര്‍ത്തു.