ശ്വാസംമുട്ടി ദില്ലി; ഇന്ന് മുതല്‍ അന്യസംസ്ഥാന ബസ്സുകള്‍ക്ക് നഗരത്തിലേക്ക് പ്രവേശനമില്ല

ദില്ലിയില്‍ വായു ഗുണനിലവാരം അതീവ ഗുരുതരാവസ്ഥയില്‍ ആയതോടെ കടുത്ത നടപടികളിലേക്ക് നീങ്ങി ദില്ലി സര്‍ക്കാര്‍. ഇന്ന് മുതല്‍ അന്യസംസ്ഥാന ബസ്സുകള്‍ക്ക് ദില്ലി നഗരത്തിലേക്ക് പ്രവേശനമില്ല. ബിഎസ്-3 പെട്രോള്‍ വാഹനങ്ങള്‍ക്കും നിരോധനമുണ്ട്.

എന്‍സിആര്‍ മേഖലയില്‍ ഉള്‍പ്പെടുന്ന ഗുരുഗ്രാം, ഗാസിയാബാദ്, ഗൗതം ബുദ്ധ്‌നഗര്‍ എന്നിവിടങ്ങളിലാണ് കര്‍ശന നിയന്ത്രണം. ദില്ലിയിലെ സ്‌കൂളുകളും കോളേജുകളും പൂര്‍ണ്ണമായും അടച്ചു. അഞ്ചാം ക്ലാസിനു മുകളില്‍ സര്‍ക്കാര്‍, സ്വകാര്യ സ്‌കൂളുകള്‍ക്ക് ഓണ്‍ലൈന്‍ വഴി ക്ലാസ് നടത്തുമെന്ന് മുഖ്യമന്ത്രി അദിഷി അറിയിച്ചു.

വായു ഗുണനിലവാര സൂചിക 400 മുകളില്‍ എത്തിയതോടെയാണ് ദില്ലി സര്‍ക്കാര്‍ പ്രത്യേക യോഗം ചേര്‍ന്ന് നടപടി ആരംഭിച്ചത്. കഴിഞ്ഞദിവസം സുപ്രീംകോടതിയില്‍ അമിക്കസ് ക്യൂറി ദില്ലി സര്‍ക്കാര്‍ നടപടികള്‍ സ്വീകരിക്കുന്നില്ലെന്ന് അറിയിച്ചിരുന്നു. കേസ് തിങ്കളാഴ്ച പരിഗണിക്കാനിരിക്കെയാണ് സര്‍ക്കാര്‍ നടപടികളിലേക്ക് കടക്കുന്നത്.