ജാര്‍ഖണ്ഡില്‍ ബസ് മറിഞ്ഞ് ഏഴു മരണം, നിരവധി പേര്‍ക്ക് പരിക്ക്

ഹസാരിബാഗ്: ജാര്‍ഖണ്ഡിലെ ഹസാരിബാഗ് ജില്ലയില്‍ യാത്രക്കാരുമായി പട്നയിലേക്ക് പോകുകയായിരുന്ന ബസ് മറിഞ്ഞ് ഏഴ് പേര്‍ മരിക്കുകയും നിരവധി പേര്‍ക്ക് പരിക്കേല്‍ക്കുകയും ചെയ്തു.

ജില്ലാ ആസ്ഥാനത്ത് നിന്ന് 50 കിലോമീറ്റര്‍ അകലെയുള്ള ഗോര്‍ഹര്‍ പോലീസ് സ്റ്റേഷന്‍ പരിസരത്താണ് അപകടമുണ്ടായത്, കുത്തനെയുള്ള വളവ് തിരിയുന്നതിനിടെ ബസ് മറിയുകയായിരുന്നു.

ഏഴ് മരണങ്ങളാണ് ഇതുവരെ സ്ഥിരീകരിച്ചത്. കൂടുതല്‍ പേര്‍ ബസിനുള്ളില്‍ കുടുങ്ങിയിട്ടുണ്ടാകുമെന്ന് ഹസാരിബാഗ് എസ്പി അരവിന്ദ് കുമാര്‍ സിംഗ് പിടിഐയോട് പറഞ്ഞു.

അപകടം നടക്കുമ്പോള്‍ കൊല്‍ക്കത്തയില്‍ നിന്ന് പട്നയിലേക്ക് പോവുകയായിരുന്ന ബസില്‍ 50 ഓളം യാത്രക്കാരുണ്ടായിരുന്നുവെന്ന് മറ്റൊരു ഉദ്യോഗസ്ഥന്‍ പറഞ്ഞു.