കൈക്കൂലി ആരോപണം. 600 മില്യണ്‍ ഡോളറിന്റെ ബോണ്ട് ഓഫര്‍ റദ്ദാക്കി അദാനി ഗ്രൂപ്പ്

ഡല്‍ഹി: ഗൗതം അദാനിയും മറ്റ് എക്സിക്യൂട്ടീവുകളും 250 മില്യണ്‍ യുഎസ് ഡോളറിന്റെ കൈക്കൂലി പദ്ധതി ആസൂത്രണം ചെയ്തതായി യുഎസ് പ്രോസിക്യൂട്ടര്‍മാര്‍ ആരോപിച്ചതിനെത്തുടര്‍ന്ന് അദാനി ഗ്രൂപ്പിന്റെ ഓഹരികള്‍ ഇടിഞ്ഞു. 

യുഎസ് ഡിപ്പാര്‍ട്ട്മെന്റ് ഓഫ് ജസ്റ്റിസ്, സെക്യൂരിറ്റീസ് ആന്‍ഡ് എക്സ്ചേഞ്ച് കമ്മീഷനും സമര്‍പ്പിച്ച കുറ്റങ്ങള്‍ മൂലം ഏഷ്യന്‍ ട്രേഡിംഗില്‍ അദാനിയുടെ യുഎസ് ഡോളര്‍ ബോണ്ടുകള്‍ കുത്തനെ കുറയാന്‍ കാരണമായി. ചില സെക്യൂരിറ്റികള്‍ 15 സെന്റ് വരെ കുറഞ്ഞു.

നിയമപരമായ സംഭവവികാസങ്ങള്‍ ചൂണ്ടിക്കാട്ടി ബോണ്ടിന്റെ വില നിശ്ചയിച്ച് മണിക്കൂറുകള്‍ക്കകം സംഘം ബോണ്ട് വില്‍പ്പന ഉപേക്ഷിച്ചു.

ഉയര്‍ന്ന മൂല്യമുള്ള സോളാര്‍ എനര്‍ജി കരാറുകള്‍ ഉറപ്പാക്കാന്‍ അദാനി എക്‌സിക്യൂട്ടീവുകള്‍ ഇന്ത്യന്‍ ഉദ്യോഗസ്ഥര്‍ക്ക് കൈക്കൂലി നല്‍കിയെന്നാണ് കുറ്റപത്രത്തില്‍ പറയുന്നത്.

യുഎസ് വിപണിയില്‍ നിന്ന് ഫണ്ട് സ്വരൂപിക്കുന്നതിനിടെ നിക്ഷേപകരെ തെറ്റിദ്ധരിപ്പിച്ചുവെന്നാരോപിച്ച് സാഗര്‍ അദാനി, വിനീത് ജെയിന്‍ എന്നിവരടക്കമുള്ളവരുടെ പേരും കുറ്റപത്രത്തില്‍ പറയുന്നുണ്ട്.