വയറിലെ അര്‍ബുദ സാധ്യതയെ കൂട്ടുന്ന ഘടകങ്ങൾ ഇതൊക്കെയാണ്

വയറിലെ കോശങ്ങള്‍ നിയന്ത്രണമില്ലാതെ വളരാന്‍ തുടങ്ങുന്നതിനെയാണ് വയറിലെ അര്‍ബുദം എന്ന് പറയുന്നത്. മാറിയ ജീവിതശൈലിയും ഭക്ഷണരീതിയുമാണ് വയറിലെ അര്‍ബുദ സാധ്യതയെ കൂട്ടുന്നത്. ചില അണുബാധകള്‍, അള്‍സര്‍, ഹൈപ്പർ അസിഡിറ്റി, മോശം ഭക്ഷണം രീതി, പുകവലി എന്നിവയെല്ലാം ആമാശയ ക്യാൻസറിന് കാരണമാകാം. അടിക്കടിയുള്ള നെഞ്ചെരിച്ചിലോ ദഹനക്കേടോ ചിലപ്പോള്‍ വയറ്റിലെ ക്യാൻസറിന്‍റെ പ്രാരംഭ ലക്ഷണമാകാം.

സ്ഥിരമായ ഓക്കാനം, ഛർദ്ദി എന്നിവയും ആമാശയത്തിലെ ആരോഗ്യ പ്രശ്നത്തെ സൂചിപ്പിക്കുന്ന സാധാരണ ലക്ഷണങ്ങളാണ്. പ്രത്യേകിച്ച് ഭക്ഷണത്തിനു ശേഷം ഇടയ്ക്കിടെ ഛർദ്ദില്‍ ഉണ്ടാവുക, ഛർദ്ദിക്കുമ്പോള്‍ രക്തം വരുക തുടങ്ങിയവ വയറ്റിലെ ക്യാന്‍സറിന്‍റെ ലക്ഷണമാകാം. ട്യൂമറിന് ആമാശയത്തിലെ ഇടം പരിമിതപ്പെടുത്താൻ കഴിയും ഇതുമൂലം ചെറിയ അളവില്‍ പോലും ഭക്ഷണം കഴിച്ചാൽ അത് നിറഞ്ഞതോ വീർത്തതോ ആയി തോന്നുന്നു.

ക്യാൻസർ ശരീരത്തിന്‍റെ മെറ്റബോളിസത്തെ മാറ്റിമറിക്കുകയും ഇതുമൂലം ഭക്ഷണത്തോടുള്ള താൽപര്യം നഷ്ടപ്പെടുകയും ചെയ്യും. കൂടാതെ ശരീരഭാരം കുറയാനും ഇടയാക്കും. ചെറിയ അളവിൽ ഭക്ഷണം കഴിച്ചതിന് ശേഷം നിങ്ങൾക്ക് അസാധാരണമാംവിധം വയറുനിറഞ്ഞതോ വയറുവേദനയോ അനുഭവപ്പെടുന്നുണ്ടെങ്കിൽ, ഇത് വയറിലെ കാൻസർ മൂലമുണ്ടാകുന്ന ദഹനപ്രശ്നത്തെ സൂചിപ്പിക്കാം. 

ഭക്ഷണം വിഴുങ്ങാൻ ബുദ്ധിമുട്ടും ആമാശയ അർബുദത്തിന്‍റെ സൂചനയാകാം. തൊണ്ടയിൽ ഭക്ഷണം കുടുങ്ങിയ പോലെ തോന്നുന്നതും ഒരു അടയാളമായിരിക്കാം. വിളര്‍ച്ചയും അമിത ക്ഷീണവും ചിലപ്പോള്‍ വയറിലെ അര്‍ബുദത്തിന്‍റെ ലക്ഷണങ്ങള്‍ ആകാം. വയറിന്‍റെ മുകൾ ഭാഗത്തെ നിരന്തരമായ വേദന, അതായത് പൊക്കിളിനു മുകളിലുള്ള വേദന, വയറിലെ നീർവീക്കം പലപ്പോഴും വയറ്റിലെ ക്യാന്‍സറിന്‍റെ സൂചനയാകാം.