ഡല്‍ഹിയില്‍ ചക്കുളത്തമ്മ പൊങ്കാല ഉത്സവത്തിന് നാളെ തിരി തെളിയും

ന്യൂ ഡൽഹി: രണ്ടു ദിവസം നീണ്ടു നിൽക്കുന്ന ചക്കുളത്തമ്മ പൊങ്കാല മഹോത്സവത്തിന് ശനിയാഴ്ച്ച (2024 നവംബർ 2) തിരി തെളിയും. മയൂർ വിഹാർ ഫേസ് 3-ലെ എ-1 പാർക്കിൽ രാവിലെ 5:15-ന് ഗണപതി ഹോമത്തോടെ ചടങ്ങുകൾ ആരംഭിക്കും. 

ചടങ്ങുകൾക്ക് ചക്കുളത്തു കാവ് ക്ഷേത്ര കാര്യദർശി മണിക്കുട്ടൻ നമ്പൂതിരി മുഖ്യ കാർമ്മികത്വം വഹിക്കും. ആദ്യ ദിവസമായ ശനിയാഴ്ച്ച രാവിലെ 5-ന് സ്ഥല ശുദ്ധി, 5:15-ന് ഗണപതി ഹോമം, വൈകുന്നേരം 6:25-ന് ദീപാരാധന, 6:30 മുതൽ ജയസൂര്യ നമ്പൂതിരിയുടെ കാർമ്മികത്വത്തിൽ ശനിദോഷ  നിവാരണ പൂജ, തുടർന്ന് രമേശ് ഇളമൺ നമ്പൂതിരിയുടെ ആത്മീയ പ്രഭാഷണം, ലഘുഭക്ഷണം എന്നിയാണ് ആദ്യ ദിവസത്തെ ചടങ്ങുകൾ.

രണ്ടാം ദിവസമായ ഞായറാഴ്ച രാവിലെ 5:15-ന് മഹാ ഗണപതി ഹോമത്തോടെ ചടങ്ങുകൾ ആരംഭിക്കും. തുടർന്ന് പൊങ്കാലയോടനുബന്ധിച്ചുള്ള വിശേഷാൽ പൂജകൾ അരങ്ങേറും. 8:45-ന് ചക്കുളത്തുകാവിലെ രമേശ് ഇളമൺ നമ്പൂതിരി ഭദ്രദീപ പ്രകാശനം നിർവഹിക്കും.

9 മണിക്ക് ചക്കുളത്തമ്മ സഞ്ജീവനി ആശ്രമം ചാരിറ്റബിൾ ട്രസ്റ്റ്, ഡൽഹി പ്രസിഡന്റ് സി കേശവൻ കുട്ടിയുടെ അധ്യക്ഷതയിൽ ചേരുന്ന സാംസ്‌കാരിക സമ്മേളനത്തിൽ പവിലിയൻ ആൻഡ് ഇന്റീരിയേഴ്‌സ് ഇന്ത്യാ മാനേജിങ് ഡയറക്ടർ ബീനാ ബാബുറാം മുഖ്യാതിഥിയും ഡൽഹി മലയാളി അസോസിയേഷൻ ജനറൽ സെക്രട്ടറി ടോണി കണ്ണമ്പുഴ വിശിഷ്ടാഥിതിയാകും. സെക്രട്ടറി ഡി ജയകുമാർ, ട്രെഷറർ എസ് മുരളി തുടങ്ങിയവർ പ്രസംഗിക്കും. മണിക്കുട്ടൻ നമ്പൂതിരി അനുഗ്രഹ പ്രഭാഷണം നടത്തും. 

ചടങ്ങിൽ 2023-24 അധ്യയന വർഷത്തിൽ ഉന്നത വിജയം കരസ്ഥമാക്കിയ 12-ാം ക്ലാസിലെ വിദ്യാർത്ഥികളായ ഇ വി അനന്തു, ബി വൈഷ്‌ണവ്, രോഹിത് രാജ് എന്നിവർക്ക് ചക്കുളത്തമ്മ അക്കാഡമിക് എക്സലൻസ്‌ അവാർഡുകളും വിതരണം ചെയ്യും. 

തുടർന്ന് ചക്കുളത്തുകാവിലെ പ്രശസ്തമായ വിളിച്ചു ചൊല്ലി പ്രാർത്ഥനക്കു ശേഷം ക്ഷേത്ര ശ്രീകോവിലിൽനിന്നും കൊളുത്തുന്ന ദിവ്യാഗ്നി പണ്ടാര അടുപ്പിലേക്ക് പകരുന്നതോടെ പൊങ്കാലക്ക് ആരംഭമാവും.

10 മണിക്ക് ശ്രീധർമ്മ ശാസ്‌താ സേവാ സമിതി, മയൂർ വിഹാർ ഫേസ്-2 അവതരിപ്പിക്കുന്ന ഭജനാമൃതം ക്ഷേത്രാങ്കണം ഭക്തി സാന്ദ്രമാക്കും. പല്ലശന ഉണ്ണി മാരാരും സംഘവും ഉത്സവ ദിവസങ്ങളിൽ താള മേളങ്ങളൊരുക്കും. വിദ്യകലാശം, മഹാകലാശം, പറയിടൽ എന്നിവയും അന്നദാനവും ഉണ്ടാവും. 

കൂടുതൽ വിവരങ്ങൾക്കും പൊങ്കാലയും മറ്റു വഴിപാടുകളും മുൻകൂട്ടി ബുക്ക് ചെയ്യുന്നതിനുമായി സെക്രട്ടറി ഡി ജയകുമാർ, ജോയിന്റ് സെക്രട്ടറിമാരായ രഘുനാഥൻ വി മാലിമേൽ, ലേഖാ സോമൻ, ട്രെഷറർ എസ് മുരളി എന്നിവരുമായി 8130595922, 9899861567, 8750138768, 9871011229 എന്നീ നമ്പറുകളിൽ ബന്ധപ്പെടാവുന്നതാണ്.