കൊക്കയാറിലെ കണ്ണീർ പ്രളയത്തിന് രണ്ടുവയസ്സ്; മുറിവുണങ്ങാത്ത മനസ്സുമായാണ് നാട്ടുകാർ ഇന്നും ആ ദിവസം ഓർത്തെടുക്കുന്നത്

ഇടുക്കി: നാട് വിറങ്ങലിച്ച പ്രകൃതിദുരന്തം നടന്നിട്ട് രണ്ടുകൊല്ലം പിന്നിടുന്നു. എട്ടുപേരുടെ ജീവനാണ് കൊക്കയാർ ദുരന്തത്തിൽ പൊലിഞ്ഞത്. 2021 ഒക്ടോബർ 16-ന് കലിതുള്ളിപെയ്ത മഴയിൽ കൊക്കയാർ മാക്കൊച്ചിയിലുണ്ടായ ഉരുൾപൊട്ടലിൽ ആറുപേർ മരിച്ചു. രണ്ടുപേർ ഒഴുക്കിൽപ്പെട്ടാണ് മരിച്ചത്.

മുറിവുണങ്ങാത്ത മനസ്സുമായാണ് നാട്ടുകാർ ഇന്നും ആ ദിവസം ഓർത്തെടുക്കുന്നത്. 16-ന് വൈകീട്ട് ഏഴരയോടെയാണ് ശക്തമായ മഴ തുടങ്ങിയത്. പതിനൊന്നു മണിയോടെ മഴ ശമിച്ചപ്പോൾ കൊക്കയാർ പഞ്ചായത്തിൽ നിരവധി ഇടങ്ങളിൽ ഉരുൾപൊട്ടി. പുല്ലകയാർ കരകവിഞ്ഞൊഴുകിയതോടെ തീരത്തെ വീടുകളിലെല്ലാം മലവെള്ളംകയറി. റോഡുകളിൽ വെള്ളംകയറുകയും പാലങ്ങൾ തകരുകയും ചെയ്തതോടെ ജനജീവിതം സ്തംഭിച്ചു.

ഇതിനിടെയാണ് മാക്കൊച്ചിയിൽ ഉരുൾപൊട്ടിയെന്ന വാർത്തയെത്തുന്നത്. സമീപവാസികൾ പാഞ്ഞെത്തി രക്ഷാപ്രവർത്തനം തുടങ്ങിയെങ്കിലും വെളിച്ചമില്ലായ്മയും കുത്തിയൊലിച്ചെത്തുന്ന മലവെള്ളവും ചെളിയും തടസ്സമായി. രാത്രി അഗ്‌നിരക്ഷാസേനയും പോലീസും നാട്ടുകാരും സ്ഥലത്തെത്തിയെങ്കിലും ഉരുൾപൊട്ടി ഒലിച്ചുപോയ മാക്കൊച്ചിയിൽ പിറ്റേന്ന് രാവിലെ മാത്രമാണ് ഇവർക്ക് എത്താനായത്. മണ്ണുമാന്തിയന്ത്രങ്ങൾ എത്തിച്ച് മണ്ണിനടിയിൽപ്പെട്ടവരെ കണ്ടെത്താനുള്ള ശ്രമമാണ് നടത്തിയത്. പതിനൊന്നു മണിയോടെ ആദ്യത്തെ മൃതദേഹം കണ്ടെത്തി. തുടർന്ന് നാല് മൃതദേഹങ്ങൾകൂടി കിട്ടി.