കണ്ണിൻ ചിറകിലൊരു മഴത്തുള്ളി  (ഓണപ്പാട്ട്)

കണ്ണിൻ ചിറകിലൊരു മഴത്തുള്ളി;
കൺകോണിലെ സ്വപനത്തിൻ കാട്.
കുടമുല്ല തഴുകിവരുന്ന കുളിർകാറ്റ്;
കൊഴിഞ്ഞുതീരാത്ത പുലരിനിലാവ്.
പൂക്കൾ തിങ്ങിയ വാനം; മണ്ണിൽ,
പൂത്താലം തീർക്കുന്ന പുലരികൾ.
(കണ്ണിൻ ചിറകിലൊരു മഴത്തുള്ളി...)
 
മുണ്ടകൻപാടത്തെ ഞാറ്റടിക്കിലുക്കം;
മുണ്ടകംകാവിൻ മിഴികളിലുത്സവമേളം.
നെല്ലിൻ പൂക്കുലകളുടെ സംഗീതം;
നിഴൽത്തുമ്പികളുടെ സ്വച്ഛന്ദ നൃത്തം.
(കണ്ണിൻ ചിറകിലൊരു മഴത്തുള്ളി...)

തീണ്ടാപ്പാടകലെ മുളയ്ക്കുന്ന കുമിള;
തുടിക്കൊട്ടിയൊഴുകുന്ന മനസ്.
അനുരാഗപ്പൂമഴയുടെ പൊഴിച്ചിൽ;
ആറും കടവും ഒന്നാകുന്ന ഭൂമിക.
(കണ്ണിൻ ചിറകിലൊരു മഴത്തുള്ളി...)

ഓർമ്മകൾ പെയ്യുന്ന നീരവതീരം;
ഒഴുകിയെത്തുന്ന തേവുപ്പാട്ട്.
ഇഴഞ്ഞടുക്കുന്ന ഒച്ചിൻ നിസ്വനം;
ഇലയനക്കം നിലയ്ക്കുന്ന നെഞ്ചകം.
(കണ്ണിൻ ചിറകിലൊരു മഴത്തുള്ളി...)

തീക്കനൽപുഴുക്കത്തിൽ ചിങ്ങനിലാവ്;
തീരാത്തിളക്കത്തിൽ ഓണനിലാവ്.
പൂവേ പൊലി പൂവേ പൊലി;
പൂക്കാലം പൊലിഞ്ഞുപോം നിലാവ്!
(കണ്ണിൻ ചിറകിലൊരു മഴത്തുള്ളി...)

-സതീഷ് കളത്തിൽ