കാലം കണ്ണാരംപൊത്തി കളിക്കുന്നു (ഓണപ്പാട്ട്)

കാലം കണ്ണാരംപൊത്തി കളിക്കുന്നു

കളംമാറി പോകുന്നു ജീവിതങ്ങൾ

ആവണി കാറ്റിൻറെ ചീറലിൽ

ആവണിപക്ഷിയും നിശബ്ദമാകുന്നു

രാക്കൊതിച്ചി തുമ്പികളെ കാണാതെ

രാവും തിങ്കളിൽ മിഴിനട്ടിരിക്കുന്നു

(കാലം കണ്ണാരംപൊത്തി കളിക്കുന്നു)

മച്ചിൻപുറത്തെ മാറാലക്കെട്ടിൽ

മലർക്കൂട മാനം കാണാതെ കരയുന്നു

തേഞ്ഞുത്തീരാറായ പെരുമ്പറ

തേട്ടിയ നാദമുയർത്തുന്നു

(കാലം കണ്ണാരംപൊത്തി കളിക്കുന്നു)

ഓലപ്പന്തും ഓലപീപ്പിയും പുലിക്കളിയും

ഓണംതുള്ളലും ഓണത്തല്ലും കഴിഞ്ഞു

ഓണമെങ്ങോ പോയ്മറഞ്ഞു; ഇന്നുഞാൻ,

ഒയ്യാരമിട്ട് പാവക്കൂത്താടുന്നു.

(കാലം കണ്ണാരംപൊത്തി കളിക്കുന്നു)

-സതീഷ് കളത്തിൽ