ഫറ ഖാന്റെ അമ്മ മേനക ഇറാനി അന്തരിച്ചു

മുംബൈ: കൊറിയോഗ്രാഫറും സംവിധായികയുമായ ഫറ ഖാന്റെയും സംവിധായകൻ സാജിദ് ഖാന്റെയും അമ്മ മേനക ഇറാനി(79) അന്തരിച്ചു. കഴിഞ്ഞ കുറച്ചുകാലമായി ആരോഗ്യപ്രശ്നങ്ങളെ തുടർന്ന് ചികിത്സയിലായിരുന്നു.

ബാലതാരങ്ങളായ ദാസി ഇറാനിയുടെയും ഹണി ഇറാനിയുടെയും സഹോദരിയായിരുന്നു മേനക. 1963 ൽ സൽമാൻ ഖാന്റെ പിതാവും തിരക്കഥാകൃത്തുമായ സലിം ഖാൻ അഭിനയിച്ച ബച്പൻ എന്ന ചിത്രത്തിൽ അഭിനയിച്ചിരുന്നു. പിന്നീട് ചലച്ചിത്ര നിർമാതാവും നടനുമായ കമ്രാൻ ഖാനെ വിവാഹം കഴിച്ചു. തുടർന്ന് അഭിനയം വിട്ടു.

ഈ കഴിഞ്ഞ ജൂലൈ 12 നായിരുന്നു മേനക ഇറാനിയുടെ 79ാം പിറന്നാൾ. അമ്മക്ക് ഹൃദയസ്പർശിയായ പിറന്നാൾ ആശംസകൾ നേർന്ന് ഫറ ഖാൻ എത്തിയിരുന്നു. താൻ കണ്ടിട്ടുള്ളതിൽവെച്ച് ഏറ്റവും ശക്തയായ ധീരയായ വനിതയെന്നാണ് ഫറ അമ്മയെക്കുറിച്ച് പറഞ്ഞത്.